Lingüistica Occitana
Lingüistica Occitana (maitot s'escriu Linguistica Occitana) es una associacion scientifica —e una revista— que se consagra a la recèrcha lingüistica sobre la lenga occitana. Se fondèt en 2004.
L'associacion a doas activitats principalas:
- Organiza l'Obrador de Lingüistica Occitana (OLO), un minicollòqui que se fai chasque an o chasque dos ans dempuèi 2002, e qu'a precedit doncas la creacion de l'associacion Lingüistica Occitana en 2004
- Publica dempuèi 2004 una revista scientifica que se sona tanben Lingüistica Occitana[1], en format electronic sus lo web. Aquela revista difusa:
- las contribucions escritas per l'Obrador de Lingüistica Occitana.
- de comptes renduts de publicacions scientificas.
- de documents divèrs tochant la lenga occitana.
La lenga de trabalh de l'associacion es l'occitan. Las lengas de publicacion per la revista son divèrsas: l'occitan sobretot mas tanben lo catalan e l'anglés.
L'objectiu de l'associacion es d'èsser un endreit de rescontre e de collaboracion entre los lingüistas universitaris e los lingüistas qu'an pas de pòst a l'universitat. Un autre objectiu es de contribuir a dinamizar la recèrcha scientifica en lingüistica occitana, pr'amor qu'es pas totjorn ben sostenguda dins las universitats d'Occitània nimai dins las associacions culturalas occitanistas.
Lo president de l'associacion es lo lingüista Joan Barceló.