Naviri meteorologic
Un naviri meteorologic èra un naviri destinat a la realizacion d'observacion meteorologicas en mar a partir d'un ponch fix. Èra equipat d'instruments de mesura permetent de mesurar lei condicions climaticas a la superficia deis oceans e en altitud. De còps, un naviri meteorologic podiá tanben èsser utilizat per d'operacions de sauvament ò per menar d'estudis oceanografics.
Lo concèpte foguèt imaginat per Météo-France en 1921 per ajudar la circulacion dei naviris e deis avions dins l'Ocean Atlantic Nòrd e lo premier naviri meteorologic intrèt en servici en 1938. Dins lo corrent de la Segonda Guèrra Mondiala, lo ret de naviris meteorologics foguèt fòrça important per leis Aliats e foguèt regularament atacats per lei sosmarins alemands. Après la guèrra, un segond ret foguèt creat dins l'Ocean Pacific Nòrd. Pasmens, a partir deis annadas 1970, lei naviris meteorologics foguèron pauc a pauc remplaçats per de gavitèus puei per de mesuras realizadas a partir de satellits. Dempuei 2010, i a plus de naviri meteorologic permanent dins leis oceans mai certanei naviris menan encara de còps de campanhas de recèrca meteorologicas.