Una mina marina es una arma constituida d'una carga explosiva plaçada a la superficia, entre doas aigas ò au fons de la mar per empachar lo passatge d'un naviri dins una zòna donada. Aparegudas durant la Guèrra de Secession, lei minas marinas son vengudas un element important de la guèrra navala modèrna, especialament per atacar lei rotas maritimas necessàrias a l'esfòrç de guèrra enemic ò per blocar sei pòrts. Dins leis aigas amigas, lei minas son tanben utilizadas per protegir l'accès a sei basas navalas e i empedir d'incursions enemigas. A l'origina, de naviris especiaus, lei minadors, èran utilizats per plaçar lei minas. Pasmens, uei, la màger part dei naviris e sosmarins militars pòdon menar aqueu tipe de mission. L'utilizacion d'aeronaus es tanben possibla.

Fotografia d'una mina marina modèrna avans son cargament dins un bombardier.

Lei minas contènon generalament una gròssa quantitat d'explosiu. Representan donc una menaça importanta per totei lei tipes de naviris. Dos ensembles de critèris permèton de descriure son mòde d'accion. Lo premier es sa posicion dins l'aiga. Lei minas a orinc son liadas per un cable a un blòt saorrat. Aquò permet de leis escondre a quauquei mètres en dessota de la superficia e de lei mantenir dins una zòna determinada. Lei minas de fons son normalament utilizadas a de prefondors de mens de 60 m. Pesucas, demòran au fons de la mar e son concebudas per tirar una torpilha au passatge d'un naviri. Lei minas derivantas son laissadas a la deriva dins lei corrents marins. Aquela tecnica permet d'aumentar la portada de l'unitat encargada de negar la mina. Pasmens, es perilhosa car es pas possible de conóisser la posicion futura de l'engenh. Lei minas rampantas son una varianta de la mina derivanta. Pasmens, es equipada d'un blòt pesuc per demorar esconduda entre doas aigas. Enfin, existís la mina ludion qu'es una mina dotada d'un sistèma de contraròtle idrostatic que la mantèn a una prefondor determinada.

Lo segond critèri de destriament entre lei diferentei minas regarda lo sistèma de mesa a fuòc. Lei minas de contacte, desenant raras car obsolètas, èran equipadas d'antenas ò de banas destinats a intrar en contacte amb un naviri. Lei sistèmas modèrnas son dichs « d'influéncia » car permèton de detectar lo passatge d'un naviri sensa contacte dirècte. N'existís tres tipes. Lei minas magneticas son activadas per la deteccion de la massa metallica d'un naviri. Lei minas acosticas explosan après deteccion d'un bruch de motor ò d'eliças. Enfin, lei minas de depression mesuran lei variacions de pression. La màger part dei minas modèrnas combinan mai d'un sistèma de deteccion.

Liames intèrnes modificar

Bibliografia modificar

Nòtas e referéncias modificar