Michael Crichton

John Michael Crichton (Chicago, 23 d'octobre de 1942 - Los Angeles, 4 de novembre de 2008) foguèt un escrivan american, especialista de sciéncia ficcion que trabalhèt tanben coma scenarista e productor de films. Es considerat coma l'inventor del tecnoroman de suspens. Venguèt famós mondialament gràcias a l'adaptacion cinematografica de Jurassic Park.

Crichton (2002)

Biografia

John Michael Crichton nasquèt a Chicago en 1942 dins una familha de classa mejana, filh de John Henderson Crichton, un jornalista, e de Zula Miller Crichton. Foguèt abalit a Long Island, Roslyn e mai Nòva York. Tre qu'èra pichonet manifestèt un interès bèl per l'escritura e tre l'edat de 14 ans teniá una colomna ligada als viatges qu'èra publicada dins The New York Times. Aviá totjorn somiat de venir un escrivan e aital comencèt a far d'estudis de literatura a l'Universitat de Harvard en 1960. Pasmens aguèt de problèmas amb un professor que lo josnotava sistematicament e aguèt doncas d'abandonar aquela via per s'endralhar cap a l'antropologia. Aprèp l'obtencion de son diplòma magistralament, Crichton s'inscriguèt a l'Escòla Medicala d'Harvard. Moriguèt lo 5 de novembre de 2008 per encausa d'un cancèr de garganta qu'èra estat diagnosticat a la debuta d'aquel an.