Metropòli europèa de Lilla

La Metropòli europèa de Lilla (MEL) es una intercomunalitat francesa de tipe metropòli, compausada a l'entorn de las vilas de Lilla, Roubaix e Tourcoing situada al centre del departament del Nòrd dins la region dels Nauts de França. Dempuèi 2020, la MEL amassa 95 comunas sus un territòri de 672km2 ont demòran aperaquí 1,2 milion d’abitants. Situada al centre d'una aira geografica densament poblada, a l’extrèm oèst de la plana d'Euròpa del Nòrd, es enrodada al sud pel bacin minièr del Nòrd-Pas-de-Calais e al nòrd per Belgica amb que parteja 84km de frontièra. La trama de l’aglomeracion que cobrís la MEL s’es formada durant lo sègle que precediguèt la Primièra Guèrra mondiala, quora la revolucion industriala menèt a l’emergéncia, entre la vila de Lilla embarrada dins sas fortificacions e la frontièra belga, de doas poderosas ciutats industrialas, Roubaix et Tourcoing. Es completada per la decision de l’Estat, a la fin de las annadas 1960, de crear una vila nòva, venguda Villeneuve-d'Ascq, a l’èst de Lilla e al sud del pòl Roubaix-Tourcoing. Ne resulta una configuracion multipolara constituïda de quatre comunas principalas enrodadas d’un semenadís de comunas pus pichonas, entre lasqualas la comuna de Lila compta pas que per 20 % de la populacion totala, çò que ne demesís fortament sa dominacion malgrat de sa centralitat istorica.