Medalha Fields

La medalha Fields es la mai prestigiosa recompensa en matematicas amb lo prèmi Abel. Es considerada coma equivalenta a un prèmi Nobel inexistent per aquela disciplina.

Es atribuïda cada quatre ans dempuèi 1936 pendent lo congrès internacional dels matematicians a quatre matematicians al plus, totes de mens de 40 ans. Los laureats recebon cadun una medalha e 15 000 dòlars canadians.

Origina

John Charles Fields, matematician canadian, prepausa la creacion d'aquela medalha en 1923 pendent una reünion internacionala a Toronto. A sa mòrt, en 1932, lèga sos bens a la sciéncia per tal de contribuïr al finançament de la medalha. L'atribucion de las doas primièras medalhas a luòc en 1936. La Segonda Guèrra Mondiala interromp la desliurança de la distincion fins en 1950. A la partença, solas doas medalhas son decernidas cada quatre ans. En 1966, la decision es presa de passar a quatre laureats al mai.

Onze « medalhats Fields » son d'ancians escolans de l'Ecole normale supérieure (Ulm) de París : Laurent Schwartz (1950), Jean-Pierre Serre (1954), René Thom (1958), Alain Connes (1982), Pierre-Louis Lions (1994), Jean-Christophe Yoccoz (1994), Laurent Lafforgue (2002), Wendelin Werner (2006), Cédric Villani (2010), Ngô Bảo Châu (2010) e Hugo Duminil-Copin (2022). Aiçò fariá d'ENS la primièra institucion del palmarés se lo classament portava sus l'establiment d'origina dels medalhats e non lo luòc d'obtencion.

Pertocant lo país d'origina, França se tròba egalament ben classada se se considèra lo luòc de formacion dels medalhats : atal en 2004, lo CNRS comptava ja 11 laureats sus 44 qu'èran eissits de laboratòris franceses. Perlongant aquel rasonament fins a 2014, s'abotís a un total de 15 medalhats Fields eissits de laboratòris franceses, çò que poiriá plaçar França en cap de las nacions formatrises d'aqueles eminents matematicians. Tanben cal mencionar que parmis aqueles, mantun es de scientifics Occitans nascuts o qu'an viscut dins lo país tals coma Jean-Pierre Serre, Alain Connes, Pierre-Louis Lions, Alexandre Grothendieck e Cédric Villani o tot simplament portant un nom de familha d'origina coma Laurent Lafforgue.

Dins la cultura populara

Dins lo film Un conte de Nadal de 2008, lo personatge interpretat per Hippolyte Girardot es medalhat Fields. Es Cédric Villani, medalhat Fields dos ans après la sortida del film, qu'a creat la demostracion que l'actor es supausat escriure al tablèu.

Dins lo film Will Hunting, lo personatge fictiu Gerald Petaç auriá recebut la medalha per d'òbras en combinatòria.

Dins lo film Un homme d'exception, John Forbes Nash se planh d'aver pas recebut la medalha.

Dins la seria televisada Eureka, Nathan Stark ditz aver recebut la medalha.

Dins la seria televisada Numb3rs, lo matematician fictiu Charlie Eppes explica a Megan Reeves l'inexisténcia d'un prèmi Nobel de matematicas.

Dins l'episòdi 6 de la sason 2 de la seria televisada Utopia, l'un dels personatges eliminats per Terrence indica ironicament qu'a obtengut la medalha.

Dins lo roman Le creux des maths de Christine Avel, la maire d'Abel, lo narrator, a obtengut la medalha.

Dins la seria televisada Maxwell-James, Mélanie Banes desira obtenir la medalha.

Dins la novèla Resoudre(x), lo matematician fictiu Raphael G. es pressentit coma podent venir lo mai jove recipiendari de la medalha gràcias a sas òbras en teoria analitica dels nombres (ipotèsi de Riemann).