Martin Ier (papa)
Martin Ièr (mòrt lo 16 de setembre de 655) foguèt lo 74en papa de la Glèisa Catolica Romana dau 21 de julhet de 649 au 16 de setembre de 655. Succediguèt a Teodòr Ièr (642-649) e foguèt remplaçat per Eugèni Ièr (655-657).
Au contrari dei papas de son periòde, son eleccion foguèt pas ratificada per l'emperaire bizantin. Dins lo corrent de son pontificat, son activitat principala foguèt de contuniar la lucha còntra lo monotelisme considerat coma una eretgia per la Glèisa d'Occident. Ansin, presidèt lo concili de Latran reünit a l'iniciativa de son predecessor per condamnar lo monotelisme. Capitèt d'i reünir un centenau d'evesques e obtenguèt la condamnacion de la màger part dei tèxtes e deis autors monotelistas. Pasmens, aqueu succès entraïnèt una reaccion de l'emperaire Constant II (641-668) qu'ordonèt son arrestacion. Martin Ièr foguèt donc arrestat lo 17 de setembre de 653 e exilat vèrs l'Empèri Bizantin (Constantinòple puei Quersonès). I moriguèt lo 16 de setembre de 655.