Leite de Vasconcelos

José Leite de Vasconcelos Cardoso Pereira de Melo, mai conegut coma Leite de Vasconcelos (Ucanha, Tarouca, 7 de julh de 1858 — Lisbona, 17 de mai de 1941) foguèt un lingüista, arqueològ e etnograf portugués. Fondèt la Revista Lusitana en 1889, l'Arqueólogo Português en 1895 e lo Museu Etnologic de Belém en 1893. Escriguèt en 1901 la primièra sintèsi de dialectologia portuguesa, Esquisse d'une dialectologie portugaise, dins l'encastre de sa tèsi doctorala presentada a l'Universitat de París.

Los estudis occitans devon a Leite de Vasconcelos la descobèrta (o puslèu lo tornar descobrir) en 1901, dins la bibliotèca de l'Universitat de Leiden als Païses Basses, de la Cançon de Santa Fe, un dels monuments mai ancians de la literatura occitana. Leite de Vasconcellos publiquèt aitanlèu lo tèxt descobèrt dins la revista Romania (en 1902).