Laurenç Casassús

Laurenç Casassús (en francés: Laurent Cazassus; Sent Gaudenç, 8 de març de 1862 – Sent Gaudenç, 11 de març de 1928) èra un politician occitan de Comenge que foguèt deputat de Nauta Garona de 1914 à 1919.

Laurenç Casassús en 1918

Biografia

Laurenç Casassús nasquèt en 1862 dins una familha modèsta de Sent Gaudenç, son paire èra sartre. Comencèt a trabalhar coma clèrgue e a l'encòp contunhava d'estudis de drech que capitèt. En seguida venguèt avocat al tribunal de Sent Gaudenç e mai tard capitèt de venir bastonièr de l'òrdre.

Pivelat per la politica, foguèt elegit conselhièr municipal e cònsol de Sent Gaudenç, abans de dintrar dins lo Conselh general de Nauta Garona que ne venguèt puèi vicepresident.

Militèt dins lo Partit Republican Radical e Radicalsocialista que ne foguèt lo capolièr. Pasmens la lucha politica se faguèt aspra dins aquela circonscripcion que los radicals i èran plan minoritaris. Fracassèt mantun còp seguit a las eleccions legislativas, las del 23 de febrièr de 1908, dins la primièra circonscripcion de Sent Gaudenç ont obtenguèt pas, al primièr torn d'escrutin, que 2.215 voses sus 12.779 votants e se retirèt abans lo segond torn. A las dels 24 d'abril e 8 de mai 1910, dins la meteissa circonscriction, ont foguèt batut, al segond torn d' escrutin, amb 6.067 voses sus 12.840 votants, per M. Bougues, (esquèrra radicala) qu'obtinguèt 6.501 voses e foguèt elegit gràcia als sufragis de dreita.