Larsa es una vila de Mesopotamia antica. Foguèt tanben la capitala d'un reiaume important de l'Antiquitat.

Mapa de la Mesopotamia antica

Lo reiaume de Larsa modificar

Lo reiaume de Larsa seriá estat fondat vèrs -2025 per Naplanum pendent lo començament de l'afondrament dau reiaume de la tresena dinastia d'Ur. Lo réine dau cinquen rèi de la dinastia, Gungunum, marca l'eissidor de la vila ambé la presa d'Ur còntra Isin. Sei successors contunièron la guèrra còntra aquela vila. Vèrs -1898, Larsa comencèt donc de trabalhs idraulics força importants per desviar l'aiga de canaus alimentant Isin. Acabadas en -1877, aqueleis òbras li donèron un avantatge decisiu[1]. En -1870, Isin perdèt la vila santa de Nippur. Maugrat una reconquista quatre ans pus tard, es una victòria simbolica fòrça importanta. Isin acumulèt adonc lei revèrs : pèrda d'Ibrat en -1844, desfacha d'una coalicion unissent Uruk, Kazallu, Isin e l’Elam còntra Larsa en -1837, segonda pèrda de Nippur en -1828 e novèla revirada d'una coalicion ambé Uruk, Babilònia, Sutum e Rapiqum en -1809[1].

D'aqueu temps, la dinastia en plaça foguèt reversada en -1834 per Kudur-Mabuk qu'aprofichèt una campanha còntra Isin. Nomèt son fiu Warad-Sin rèi de la vila. Un periòde de construccion (temples, canaus) comencèt. En -1802, lo rèi Rim-Sin lancèt son ofensiva finala còntra lo reiaume d'Isin. Prenguèt Uruk (-1802), Al-Damiq (-1799), Dunnum (-1795) e assetgèt Isin. Maugrat una intervencion de Babilònia, la vila tombèt en -1794 o -1793. Es l'apogèu de Larsa mai durèt gaire. En -1764, una guèrra esclatèt ambé Babilònia. Mashkan-shapir, capitala segondària, e Larsa foguèron presas en -1764 e -1763. Rim-Sin e sei fius foguèron capturats e mandats en Babilònia.

La rebellion de Rim-Sin II modificar

Larsa foguèt adonc annexada au reiaume de Babilònia fins a -1741 quand la vila lancèt una revòuta dins lo país de Sumèr. Pasmens, l'insurreccion, comandada per un nomat Rim-Sin II foguèt matada en -1738 o -1736. Après aquelei combats, la region èra devastada e subiguèt donc lo despoplament dau sud de Mesopotamia.

Lista dei rèis de Larsa modificar

Nòtas e referéncias modificar

  1. 1,0 et 1,1 Luc Bachelot, Francis Joannès, Cécile Michel, Dictionnaire de la civilisation mésopotamienne, Laffont (2001).