Lagaf'

Vincent Rouïl, dich Vincent Lagaf' o simplament Lagaf', nascut en França lo 30 d'octobre de 1959 a Bernay (Normandia), es un umorista e cantaire francés, sustot conegut dempuèi las annadas 1990 coma animator popular a la television francesa. Son chafre es evidentament inspirat del personatge de benda dessenhada Gaston Lagaffe (creat pel dessenhaire bèlga Franquin).

Lagaf' en 2006

Vincent Lagaf' comença per una carrièra d'umorista e es revelat de caps 1987 dins l'emission La Classe sus la tresena cadena de television francesa (FR3). En seguida, enregistra de cançons parodicas, doas d'entre elas en particular van aver una capitada colossala en França : Bo le lavabo, n°1 en 1990, e La Zoubida, n°1 en 1991.

Vengut l'una de las personalitats publicas mai popularas de França de la debuta de las annadas 1990, es alavetz dempuèi recrutat per presentar divèrsas emissions de television, demest las qualas Le Bigdil o Le Juste Prix.

"Bo le lavabo (WC Kiss)"

Entre 1987 e 1990, la mòde del movement musical dich house music es al som. Aquel estili importat dels Estats Units en passant pel Reialme Unit fa pas consensus en Euròpa continentala, en França e en Occitània en particular : malgrat que sia venguda plan populara a partir de 1987 en çò de la generacion jove en França e encara mai en Belgica (New beat), d'un biais general, la house es sovent denonciada coma una imposture musicala : en efièch, la particularitat de la house music es que s'agís pas realament de cançons creadas per de compositors, sovent quitament pas realament cantadas, mas de tròces eissits de pegatges, d'adobaments e de mesclatges realizats a l'origina en dirècte pendent seradas en discotècas per de discjoqueis, puèi enregistrats tornamai en estúdio a partir de tròces de cançons ja existentas e d'escapolons divèrses e variats.

Lagaf' a donc l'idèa de rire d'aquò : placa alavetz sul tèma house French kiss de Lil' Louis un tèxte en francés pèc e repetitiu ("Coma es polit lo lavabo ! coma es laid lo bidet !") simulant los escapolons de voses en bocla de la house, e d'una faiçon generala explica dins lo tèxt de sa cançon parodica Bo lo lavabo qu'es aital plan facil sens quitament èsser musician ni quitament cantaire de far un tube cada annada e de dintrar dins lo Top 50. Li balhant rason, aquel títol coneis una quita capitada al delai de las esperanças de Lagaf' e ven quitament en França un vertadièr fenomèn de societat, vist que, ironicament, aquela parodia es al mes de junh de 1990 n°1 del Top 50 ont esperava dintrar segon los dires de las paraulas de sa cançon, mentre que lo tèma house original utilizat coma basa instrumentala (French Kiss de Lil' Louis) de son costat foguèt sonque classat 5en del dich Top 50 francés al mes de novembre de 1989.

Cançons mai conegudas

• Bo le lavabo (1990, parodia en francés basada sus tèma French Kiss de Lil' Louis)
• La Zoubida (1991, parodia del aire tradicional francés Le Pont de Nantes)
• Je veux des vacances (1993)