La Maestà (Duccio)
La Maestà es una pintura a tempèra sus panèus de fust que venguèt realizada entre 1308 e 1311 e que consistuís l'òbra-mèstra del pintor italian Duccio di Buoninsegna, un dels pintres màjers de l'escòla de pintura sienesa de qué es considerat lo fondador.
La pintura se teniá inicialament dins la catedrala de Siena mas venguèt desseparada, es uèi conservada dins lo Musèu dell'Opera Metropolitana del Duomo de Siena per la màjer part, qualques panèus de la predèla se tròban despartits entre divèrses musèus del mond.
Se ne vira d'un retaule de doas caras : sus l'envèrs vènon figuradas una grand scèna amb la Verge e l'Enfant enrodats d'àngeus e sants e mai d'autras scènas mendres mentre que sus lo revèrs se tròban vint-e-sièis scènas de la Passion del Crist, en mai d'autres episòdis de la vida de Jesus e dels personatges biblics sus la part sobeirana.
La Maestà es l'òbra mai importanta de Duccio, loquin voliá conjugar dins aquèsta pintura lo melhor del talent dins las tecnicas graficas amb la grand sensibilitat que teniá dins la composicion e lo dessenh. En la fin, la suá òbra ven remirada per la suá elegança plena de rafinament e las suás colors que li dònan una beutat cèrta.
Istòria
modificarMaestà es la denominacion d'un tèma iconografic de l'art crestian medieval occidental ; representa la Vèrge amb l'Enfant, entronizada, en una fòrma similara al Theotokos de l'art bizantin d'Orient (qu'amb el l'art crestian catolic d'Occident parteja una origina comuna dins l'art crestian dels primièrs sègles). Lo tèrme se ne ven de la locucion latina Maiestas Mariae amb laquina se designava la Majestat de Maria, val-a-dire un concèpte teologic de la mariologia e de l'istoriografia que se fa referéncia a la Vèrge coma tròn de l'Enfant-Dieu Jesus.
Duccio recebèt la comanda per aquèsta òbra en 1308 : lo 9 d'octòbre d'aquest'an venguèt signat lo contracte entre l'artista e lo cap de la comunitat de bastiment de la catedrala, conservat en l'Archiu d'Estat de Siena. Lo pintre s'engatjava a « pénher un panèl de fust pel autar màjer de la glèisa de Santa-Maria de Siena », e a obrar sus aqueste panèl esclusivament « segon la suá melhora sciéncia e coneissença ». Los seus honoraris èran de 16 soldi (de sòus) jornalièrs, amb lo finançament del material e dels tròçes de fust. Foguèt tamben requesit que l'artista jurèsse sus l'Evangèli de complir çò qu'èra estat convengut sens deguna frauda.
Se conserva un document addicional que fa mencion del revèrs de l'òbra, qu'aviá de conténer 38 scènas. I està escrich que Duccio recebriá en pagament 2,5 florines d'aur per caduna d'aquèlas 38 scènas.