John Entwistle, que naissèt lo 9 d'octòbre de 1944 a Chiswick dins lo borough londinenc d'Hounslow e morèt lo 27 de junh de 2002 a Paradise dins l'estat de Nevada ais Estats Units, siguèt un musician e productor britanic. Siguèt lo bassista dau grope de rock The Who.

John Entwistle sus la scena en 1976.

Lo considèran coma un dei bassistas mai talentós e importants de toi lei temps. Virtuós, desvelopèt de tecnicas de juec que rèstan de referéncias. Cambièt la percepcion e la plaça de la bassa au sen d'un grope de rock, e marquèt tre 1965 lo premier succès dei Who - My Generation - em' un solo que joguèt a una vitessa estonanta per l'epòca.

En 2000, la revista anglesa Guitar Magazine lo consacrèt "melhor bassista dau millenari" pendent qu'en 2011 lei lectors de Rolling Stone l'elegissèron coma lo melhor bassista de toi lei temps.