Jad Wio

Jad Wio es un grop de pop ròck francés parisenc de las influéncias multiplas, batcave, cançon francesa, new wave o quitament electro. Es format en 1982 pel duò Denis Bortek al cant e Christophe K-Bye a la guitarra, duò que s'entorna segon los periòdes de musicians adicionals.

Jad Wio sus l'empont en 2006 (Denis Bortek e Christophe K-Bye)

Biografia

Al debut, cantavan mai que mai en anglés, en fasent qualquas represas coma la de You're Gonna Miss Me del grop psychedelic american 13th Floor Elevators o Paint it, black dels Rolling Stones.

A partir de 1989 e de l'album Contact, oficialament e retrospectivament lo segond del grop (en realitat, lo precedent Cellar Dreams es mai una compilacion de lors cançons sortidas entre 1982 e 1986 qu'un album vertadièr), començan de cantar majoritariament en francés (L'amour à la hâte, Ophélie, 36-15 mad sex...). Aqueste album coneís une capitada vertadièra gràcias en particular a la cançon Priscilla, que demòra encara uèi la cançon mai coneguda del grop.

Al debut de las annadas 90, Jad Wio es donc vengut un grop de primièra categoria de la scèna rock en França, Priscilla passa sus las ràdios generalistas e son clip sus la quita cadena de television francesa M6, e a sa sortida, lo tresen disc e segond album vertadièr, Fleur de métal, es esperat del mitan brancat rock. Aital, en 1992, la cançon Bienvenue es una novèla capitada per Jad Wio, seguida per dos autres singles qu'an tanben un pauc de resson al nivèl exagonal, Tsé-tsé, e tanben S.O.S. mesdemoiselles (represa del rocker beatnik francés Ronnie Bird). Mens rock 80's new wave que Cellar dreams e Contact, mai cançon francesa tanben, ambe Fleur de metal Jad Wio se vira cap a la tematica beatnik hippie en i mesclant la de la sciènça ficcion, e d'aquesta passa, la cançon Contact (compausada en 1968 per Serge Gainsbourg e cantada a l'epòca per Brigitte Bardot) es benlèu la mai representativa de l'esperit de l'album.

En seguida, faguèron en 1993 una brava virada de totes los emponts de França per promòure l'album, ambe tanben mantuns passatges a la televison, coma lo demorat culte ont i cantèron Bienvenue en duo ambe Étienne Daho.

En 1995 sortiguèron l'album Monstre-toi. Aqueste album recebèt mens de resson que los dos precedents, e fin finala, aprèp l'aver defendut sus l'empont per una novèla virada, cap a la manca de vam, lo grop se dessepara. Aital, en 1997, es non pas un album novèl de Jad Wio que sortís, mès un album solò de Denis Bortek, simplament titolat Bortek. L'album coneis une certa capitada, mès sens comparason pr'aquò ambe la de l'atge d'òr de Jad Wio entre 1989 et 1994.

Fin finala, lo grop s'es tornat formar en 2004, e quitament pas tròp actiu dempuèi, contunhan de sortir d'albums, Nu Cle Air Pop en 2005, Sex Magik - Histoire de Lilith Von Sirius en 2007, Mr D & The Fangs - 1888 en 2020, Cadavre Exquis en 2023... De temps en temps, tòrnan sus l'empont tanben.

Discografia

• 1986: Cellar dreams (compilacion)
• 1989: Contact
• 1992: Fleur de métal
• 1995: Monstre-toi
• 2005: Nu Cle Air Pop
• 2007: Sex Magik - Histoire de Lilith Von Sirius
• 2020: Mr D & The Fangs - 1888
• 2023: Cadavre Exquis

Cançons mai conegudas

• Priscilla (1989)
• L'amour à la hâte (1989)
• Ophélie (1989)
• Bienvenue (1992)
• S.O.S. mesdemoiselles (1992, represa de Ronnie Bird)
• Tsé-tsé (1993)
• Victor (1995)
• Das ist (2007)