The Rolling Stones es un grop de rock britanic, format en 1962 pel guitarrista e menaire original Brian Jones, lo pianista Ian Stewart, lo cantaire Mick Jagger e lo guitarrista Keith Richards. Lo bassista Bill Wyman e lo bataire Charlie Watts rejonhèron puèi la formacion originala. Son nom es sortit d'una cançon de Muddy Waters, Rollin' Stone. Lo blues foguèt totjorn la font d'inspiracion principala dels Stones, que foguèron un dels actors principals del retorn d'aquela musica sul davant de la scèna, a travèrs lo « British blues boom ». Los premièrs enregistraments dels Rolling Stones foguèron de represas de blues e de rythm and blues americans. Après aver encontrat lo succès al Reialme Unit, venguèron populars als Estats Units, durant la « British Invasion » iniciada pels Beatles) al mitan de las annadas 1960. Foguèt en 1965, gràcias al títol (I Can't Get No) Satisfaction, que la formacion se faguèt conéisser internacionalament.

The Rolling Stones, Milwaukee, 2015.
The Rolling Stones 1965: Brian Jones, Charlie Watts, Mick Jagger, Keith Richards, Bill Wyman

Brian Jones moriguèt negat dins sa piscina en julhet de 1969, pauc de temps après sa mesa a pè del grop. Foguèt remplaçat per Mick Taylor que participèt a las viradas e a l'enregistrament de cinc albums studio abans de daissar lo grop en 1974. L'ancian guitarista dels Faces, Ronnie Wood, prenguèt alara sa plaça e la gardèt. Bill Wyman daissèt lo grop en 1993. Lo bassista Darryl Jones rejonhèt alara los Stones sense ne venir un sòci oficial.

Los Rolling Stones publiquèron vint e tres albums studio al Reialme Unit (vint e cinc als Estats Units), totes classats dins lo top detz britanic, trente doas compilacions e uèit albums en concèrt.]