Guèrra de Corint
|
Guèrra de Corint
| |
|---|---|
| Informacions generalas | |
| Data | 395 - 387 avC |
| Luòc | Grècia |
| Casus belli | Diferents territoriaus e politics entre Esparta e Tebas |
| Eissida | Patz d'Antalcidas entre lei ciutats-estats grègas |
| Belligerants | |
| Coalicion de ciutats-estats dirigida per Esparta | Aliança entre una coalicion de ciutats-estats dirigida per Tebas, Atenas, Corint e Argos e l'Empèri Pèrsa |
| Batalhas | |
| Haliartus — Nemea — Cnidus — Queronèa — Lechaeum | |
La Guèrra de Corint foguèt un conflicte de l'Antiquitat grèga que se debanèt de 395 a 387 avC. Opausèt inicialament Esparta e Tebas a prepaus de l'expansion territoriala dei doas ciutats dins lo nòrd-èst de Grècia. Pasmens, Tebas recebèt rapidament lo sostèn de Corint, d'Argos e d'Atenas e la guèrra se generalizèt. Sus la tèrra, leis Espartencs obtenguèron unei succès au començament de la guèrra mai poguèron menaçar vertadierament lei centres de la coalicion enemiga. Au nivèu maritim, la flòta d'Esparta foguèt anientada per lei Pèrsas. Leis Atenencs poguèron donc mandar una tièra d'ofensivas sus lei posicions espartencas e reconquistar una partida de son empèri perdut durant la Guèrra de Peloponès.
Aquelei succès entraïnèron un cambiament d'aliança dei Pèrsas que s'inquietèron d'un redreiçament de la poissança atenenca. Sensa aqueu sostèn, leis enemics d'Esparta poguèron pas contuniar la lucha e de negociacions acomencèron sota l'arbitratge pèrsa. Lei dos camps concluguèron la patz d'Antalcidas que sei consequéncias principalas foguèron la proclamacion d'una patz comuna entre lei ciutats grègas e l'oficializacion dau ròtle egemonic d'Esparta qu'obtenguèt lo drech de faire aplicar per la fòrça lei disposicions dau tractat.