Glacièr d'Aletsch

Lo glacièr d'Aletsch es lo pus grand glacièr dels Alps, situat dins lo sud de Soïssa dins lo canton de Valés. Es enrodat al nòrd per lo massís de Jungfrau, al sud per la val de Ròse amb la quala lo glacièr comunica via las gòrjas de la ribièra Massa, a l'èst pel lac Märjelen e a l'oèst per l'Aletschhorn.

Glacièr d'Aletsch vist d'Eggishorn

Geografia

Sa longor es de 23,6 quilomètres (en 2001) per una superficia de 117,6 km² (o 128 km² segon la commission d'evaluacion de l'UNESCO) e una massa de 27 miliards de tonas de glaça. Sa part mediana avança a una velocitat de l'òrdre de 180 mètres per an. Nòu soms que l'enròdan despassan los 4 000 mètres d'altitud per una nautor mejana de 4 108 mètres. Lo glacièr es alimentat en glaç e en nèu per tres nevièrs principals que son : Ebnefluhfirn, Gletscherhornfirn e Kranzberfirn. Aqueles debutan a aperaquí 3 800 mètres d'altitud, per se rejónher dins una zona dicha Konkordiaplatz (plaça de la concòrdia) ont la glaça pòt aténher una espessor de mai de 900 mètres. Un pichon nevièr lateral de 3 quilomètres e 600 mètres de larg, Grüneggfirn ven de l'èst e rejonh la Konkordiaplatz a la nautor de las cabanas la Konkordia. Es tanben conectat a Fieschergletscher via Grünhornlücke (3 280 mètres).

La glaça amolonada a la Konkordiaplatz, vasta zona plana d'aperaquí 1,5 kilomètre de larg, se desplaça d'aperaquí 180 mètres per an cap al sud-èst pe entamenar sa longa davalada dins la val glaciària.