Giorgio Perlasca
Giorgio Perlasca (31 de genier de 1910, Còme - 15 d'aost de 1992, Pàdoa) foguèt un foncionari e un òme d'afaires italian famós per sa participacion au sauvament d'aperaquí 5 200 judieus ongrés en 1944-1945.
Faissista e ancian combatent nacionalista de la Guèrra d'Espanha, èra dins la capitala ongresa a la data de la capitulacion italiana de 1943. Demorèt fidèu au rèi e refusèt de jónher la Republica Sociala Italiana de Benito Mussolini. Per aquò, foguèt obligat de se refugiar dins l'ambaissada d'Espanha que li donèt una ciutadanetat espanhòla e un passapòrt fictius. Vengut « Jorge Perlasca », ajudèt alora lo diplomata Ángel Sanz Briz qu'aviá creat un sistèma de distribucion de passapòrts espanhòus ai judieus ongrés menaçats de desportacion. En novembre de 1944, quand l'ambaissada espanhòla foguèt abandonada en causa de l'avançada sovietica, Perlasca capitèt de se far passar per lo novèu cònsol espanhòu e de contuniar de protegir lei judieus « espanhòus » fins a la fin de la batalha de Budapèst.
Brèvament arrestat per l'Armada Roja, rintrèt en Itàlia onte reprenguèt sa vida anteriora. Foguèt retrobat en 1987 per de judieus ongrés installats en Israèl. Dos ans pus tard, recebèt lo títol de Just entre lei Nacions.
Liames intèrnes
modificar- Olocaust.
- Ángel Sanz Briz, diplomata espanhòu a l'origina dau ret de distribucion de passapòrts ai judieus ongrés.