Frank Smythe
Frank Smythe (6 de julhet de 1900, Maidstone - 27 de junh de 1949, Delhi) es un alpinista e escrivan britanic. Dins leis ans 1930, foguèt una figura importanta de l'alpinisme imalaian. En 1930, participèt a una expedicion au Kangchenjunga que foguèt blocada per una avalanca e una muralha de glaç a 7 000 m. Quauquei setmanas après aquela revirada, faguèt partida dau premier grop qu'arribèt a la cima dau pic Jongsong (7 459 m), çò qu'èra un recòrd d'altitud per lo periòde. Bateguèt aqueu recòrd tre 1931 en dirigissent l'expedicion que realizèt la premiera ascension dau Kamet (7 756 m). Puei, en 1933, 1936 e 1938, participèt a plusors temptativas d'ascension dau Mont Everest. I agantèt 8 550 m d'altitud en 1933 sensa utilizar d'aparelh respiratòri.
