Francés Aussolelh

Francés Aussolelh (en francés: François Aussoleil; Marcilhac la Crosilha, 15 d'octobre de 1861 – Marcilhac la Crosilha, 31 de genièr de 1928) èra un ensenhaire e politician occitan de Lemosin que foguèt Deputat de Corresa de 1919 a 1924.

Francés Aussolelh en 1921

Biografia

Francés Aussolelh, aprèp aver obtengut una licéncia de letras, foguèt nomenat repetidor al collègi del Puèi, e mai tard al licèu de Borges. En 1904 entamenèt sa carrièra d'ensenhaire al collègi de Commercy, e foguèt mandat puèi dins divèrses cantons d'Occitània. Arribèt a Bedarius primièr abans de partir per Leitora, Santas, Mende, Milhau e finalament a ras de son país nadiu, a Briva.

Del temps qu'èra dins aqueste darrièr pòste, foguèt designat per son partit, la SFIO, per se presentar a las eleccions generalas legislativas del 16 de novembre de 1919 dins la circonscripcion de Corresa sus la lista socialista que n'aviá pres la direccion. Ne sortiguèt sol elegit e s'installèt alara dins la Cambra dels deputats.

Inscrich al grop del Partit Socialista, venguèt membre de la Comission dels comptes definitius, de la Comission de l'ensenhament e de las Bèlas Arts, de la Comission d'Alsàcia e Lorrena, de la Comission de las minas e de la Comission de legislacion civila e criminala. Participèt dins de discussions divèrsas, coma per exemple: lo budgèt general de l'exercici 1921 per tal d'explicar lo vòte del grop socialista (1921), la refòrma de l'ensenhament segondari, la Bibliotèca Nacionala Francesa, la Bibliotèca Mazarine, los transpòrts postals (1922), lo recrutament de l'armada, l'aumentacion dels prèses dels loguièrs (1923), la dobla decima, las refinariás de sucre e de petròli (1924).

En seguida del Congrès de Tors, decidiguèt de venir membre del Partit Comunista Francés e en 1924, foguèt cap de la lista del Blòc Obrièr e Pagés (en francés Bloc ouvrier et paysan) en Corresa pasmens capitèt pas de recuperar son mandat. Tornèt a son país ont se moriguèt quatre ans mai tard.