Forum Julii
Forum Julii es una colonia galloromana qu'es venguda la vila de Frejús. Foguèt probable fondada après la conquista dau sud-èst de Gàllia a una data desconeguda. Conoissèt una extension importanta après sa designacion per Juli Cesar coma pòrt principau de Roma dins la region après lo sètge de Marselha en 49 avC. Fidèla a August durant la guèrra civila còntra Marc Antòni, la colonia recebèt de privilègis importants e venguèt la basa d'una flòta de guèrra romana. Puei, demorèt l'objècte de l'atencion dau poder centrau durant lo rèine de Tibèri que la dotèt d'infrastructuras de prestigi coma un teatre, un anfiteatre e un pòrta-aiga. La colonia gardèt son importància durant tot lo periòde imperiau. En 374, venguèt lo sèti dau segond evescat fondat en Gàllia. Pasmens, declinèt a partir dau sègle V avC en causa de l'ensablament de son pòrt. Finalament, foguèt pilhada en 572 per lei Lombards e en 574 per lei Saxons.
