Discors raportat

En gramatica, lo discors raportat es un discors exterior integrat dins un purmèr discors. Las diferentas formas de discors raportat son lo discors dirècte, lo discors indirècte e lo discors indirècte libre.

Lo discors dirècte

Lo discors dirècte es la represa literau deu discors d'un locutor exterior, diferent deu locutor de basa. En occitan, es presentat enter verguetas. Si aqueth discors es un dialòg, cada intervencion d'un deus locutors, sauv la prumèra, es senhalada per ua linheta.

Lo discors raportat es generaument introdusit per ua frasa que balha l'identitat deu locutor de qui son raportadas las paraulas. Pòt tanben precisar las condicions dens las quaus son ditas las paraulas raportadas (moment, lòc, sentiments deu locutor...). La frasa introductiva se pòt trobar en mantuas posicions, per rapòrt au discors raportat.

Lo discors indirècte

Lo discors indirècte es la represa literau deu discors exterior que pèrd la soa autonomia. En occitan, pren la forma d'ua proposicion subordinada complement deu vèrbe de la frasa introductiva. La conjoncion de subordinacion QUE marca generaument lo començament deu discors indirècte o, dens lo cas d'ua frasa interrogativa, lo mot interrogatiu.

Lo discors indirècte libre

Lo discors indirècte libre presenta caracteristicas deu discors dirècte (n'es pas en posicion de subordinacion) e deu discors indirècte (abséncia de verguetas, transposicions deus pronoms personaus...). En occitan, n'es pas corrent e se tròba sustot dens la lenga literària.