Deutsches Afrikakorps
Lo Deutsches Afrikakorps (sovent dich Afrikakorps) es lo nom dau còrs expedicionari alemand mandat en Africa per sostenir l'armada italiana engatjadas còntra lei Britanics durant la Segonda Guèrra Mondiala. Creat lo 19 de febrier de 1941, lo còrs èra principalament compausat d'unitats blindadas. Seis efectius maximaus agantèron 133 000 òmes en 1943 e recebèt d'armaments modèrnes coma de carris pesucs Tigre. Son comandant principau foguèt lo generau Erwin Rommel.
A son arribada, l’Afrikakorps permetèt a l'Aisse de prendre l'avantatge. En octòbre de 1942, intrèt en Egipte mai foguèt blocat a El-Alamein lo 3 de novembre. Lo generau britanic Bernard Montgomery esperèt alora lo temps necessari per concentrar sei tropas e prendre l'avantatge. Gràcias a una importanta superioritat numerica e materiala, s'impausèt definitivament a El-Alamein e l’Afrikakorps deguèt se retirar vèrs l'oèst. Gràcias a son cap, poguèt defugir la captura e passar en Tunisia onte lei Germanoitalians establiguèron plusors linhas defensivas en aprofichant la preséncia de zònas montanhosas. En febrier de 1943, una premiera ofensiva estatsunidenca foguèt donc arrestada a la batalha de Kesserine. Pasmens, l’Afrikakorps poguèt pas resistir ais atacas seguentas. Hitler ordonèt lo remplaçament de Rommel per defugir sa captura. L'ensemble dei defensas germanoitalianas s'afondrèt a partir de març e lo rèsta de l’Afrikakorps capitulèt au Cap Bon lo 12 de mai de 1943.
Causa excepcionala durant la Segonda Guèrra Mondiala, leis unitats alemandas de l’Afrikakorps respectèron lei lèis de la guèrra e foguèron pas accusadas de crimes de guèrra après lo conflicte. Conjugada amb l'abiletat de Rommel per combatre un adversari pus nombrós, aquela particularitat donèt un gròs prestigi au còrs.