Daft Punk
Daft Punk, prononciat en anglés [dæft pʌŋk], es un grop de musica electronica francés, originari de París (França). Compausat del duò Thomas Bangalter e Guy-Manuel de Homem-Christo, lo grop es actiu entre 1993 e 2021. Las parts cantadas de lors composicions son mai que mai en anglés.
La musica de Daft Punk deu son originalitat al fach qu'es en descalatge complèt ambe la mòda "eurodance" dominanta de l'epòca : en efièch, coma d'autres grops de la scèna electronica francesa de la fin de las annadas 90 (Air, Stardust, Mr. Oizo etc), Daft Punk a per referéncia puslèu la musica electronica originala de las annadas 70 (l'influéncia syntpop de Kraftwerk es perceptibla) e quitament lo disco (Get lucky, Around the world, One more time, Giorgio by Moroder) e son derivat funk (Robot rock, Da funk) de la fin de las annadas 70 e de la debuta de las annadas 80. Aital, al delai de l'etiqueta house que lor es acolada, comencèron per fa justament en realitat una androna audaciosa sus la house istorica de la periòda 87-90, e mai encara sus la tècno contemporanèa de lors pròprias produccions. A posteriori, Daft Punk es ara catalogat house dins lo sens ont an impausat lor pròpri estili dins aquel larg registre, e donc coma tals son considerats coma precursors d'un sosgenre tardiu a part entièra de la house (la French touch, "l'estili de França"). En efièch : la causida artistica originala tendéncia vintage 70 e nòu-disco de Daft Punk es paganta vist qu'obtenon una capitada internacionala immediata, capitada que contribuïrà en seguida a valorizar la scèna francesa dins la granda familha de la musica electronica, fasent de la French touch una valor segura d'aquel registre musical.
Al nivèl del visual, s'inspiran del filme Phantom of the Paradise de Brian De Palma e apareisson totjorn anonimes, sens cara, portant sistematicament en public de cascos e de costumes. D'aqueste biais, la referéncia al grop disco Space (per exemple sul títol Robot rock) es tanben evidenta.
Lo primièr album de Daft Punk, Homework, sortís en 1997. Es una capitada immediata ambe los tubes Da funk e Around the world. Lo segond album, comercializat en 2001, se titola Discovery e compren mantuns succèsses coma per exemple One More Time e Harder, Better, Faster, Stronger. Lor tresen album, Human After All, es publicat en 2005. Conten lo single Robot rock basat sus un escapolon de Release the Beast del grop funk american Breakwater.
En 2010, Daft Punk compausa la benda sonòra del film Tron : Legacy.
En 2013, Daft Punk sortís l'album Random Access Memories, qu'obteng una capitada internacionala colossala e cinc Grammy Awards, e conten l'un dels mai gròsses tubes internacionals de la decennia, Get Lucky, títol en collaboracion ambe Pharrell Williams (au cant) e Nile Rodgers.
Lo 22 de febrièr de 2021, anóncian la separacion de lor duò dins una video titolada Epilogue après vint e uèch ans de carrièra.
Discografia
modificar- 1997 : Homework
- 2001 : Discovery
- 2005 : Human After All
- 2013 : Random Access Memories
Cançons mai conegudas
modificar- Da funk (1997, basat sus Bounce, Rock, Skate, Roll de Vaughan Mason & Crew e I'm Gonna Love you Just a Little More Baby de Barry White)
- Around the world (1997)
- Burnin' (1997)
- Revolution 909 (1998)
- One More Time (2000, basat sus More Spell On You d'Eddie Johns)
- Aerodynamic (2001, basat sus Il Macquillage Lady de Sister Sledge)
- Digital love (2001, basat sus I Love You More de George Duke)
- Harder, Better, Faster, Stronger (2001, basat sus Cola Bottle Baby d'Edwin Birdsong)
- Robot rock (2005, basat sus Release the Beast de Breakwater)
- Technologic (2005)
- Derezzed (2010)
- Get lucky (2013, ambe Pharrell Williams)[1]
- Instant crush (2013, ambe Julian Casablancas)[2]
- Giorgio by Moroder (2013)
- Starboy (2016, ambe The Weeknd)
- I Feel It Coming (2017, ambe The Weeknd)