Cultura de Shulaveri-Shomutepe

La cultura de Shulaveri-Shomutepe es una cultura neolitica de la region centrala de Transcaucàsia descubèrta dins lo corrent deis annadas 1960. Seis originas son desconegudas mai d'influéncias meridionalas (Mesopotamia) e occidentalas (Anatolia) son probablas. Apareguèt au començament dau millenari VI av. JC e dispareguèt vèrs la fin dau millenari seguent.

Aquela cultura aviá lo mestritge de l'agricultura (blat, milh, òrdi, pese, lentilha) e dau norrigatge (cabras, motons, bovins e pòrcs) e èra au mens parcialament sedentarizada. Pasmens, dins certanei regions, la caça (cèrvis) gardèt un ròtle important. Leis abitants vivián dins de vilatges pichons, generalament 100 m de diamètre, establits sus d'autors. La terralha èra inicialament desconeguda mai se desvolopèt pauc a pauc. Durant lei sègles finaus de la cultura de Shulaveri-Shomutepe, se pòu ansin trobar de terralhas pintadas. La metallurgia dau coire natiu existiá mai èra fòrça limitada. En revènge, lei tecnicas de fabricacion d'otís de pèira ò d'obsidiana èran ben conegudas e fòrça utilizadas.