Beta Israèl
Lei Beta Israèl, Falachas[1] ò Josieus Etiopians[2] èran una comunautat josieva de l'Empèri Etiopian installada dins lei regions de Tigre e de Gondar. L'origina de son installacion es desconeguda. Formavan de principats pichons que foguèron a cha pauc conquistats per leis Etiopians fins au sègle XVII. I foguèron a cha pauc marginalizats (defensa de tenir de tèrras, acusacions de mascariá... etc.). En causa de son isolament, an desvolopat de trachs religiós pròpris e lo contacte ambé lo judaïsme occidentau au sègle XIX a entraïnat de modificacions importantas dei rites dei Beta Israèl per redurre lei diferéncias. Dempuei 1975, son oficialament reconeguts coma josieus per Israèl e la quasi totalitat a quitat Etiopia per s'installar dins aqueu país dins lo corrent deis annadas 1980 e 1990. I èran oficialament 110 000 en 2009 (còntre mens de 3 000 sus lo territòri etiopian) mai i foguèron totjorn victimas de discriminacions.