Batalha de Cherborg
La batalha de Cherborg se debanèt durant la Segonda Guèrra Mondiala entre lo 6 e lo 30 de junh de 1944. Opausèt una partida dei tropas estatsunidencas qu'avián desbarcat en Normandia a un ensemble despariat d'unitats alemandas blocadas dins lo nòrd de la peninsula de Cotentin. Per leis Aliats, l'objectiu èra de prendre lo contraròtle d'un important pòrt en vista de facilitar l'avitalhament dei fòrças engatjadas dins la batalha de Normandia. Per leis Alemands, l'objectiu èra, au contrari, d'empachar la captura deis infrastructuras portuàrias. Lei combats, fòrça violents, s'acabèron per una desfacha alemanda.
Leis Alemands dispausavan d'un nombre relativament important de combatents (aperaquí 50 000 òmes), mai la preparacion dei defensas èra insufisenta per arrestar una ofensiva venguda dempuei lo continent. Lei defensors èran compausats de la garnison locala e d'unitats dispausadas lòng dei plajas. Dispausavan pas de blindats e lei resèrvas de municions èran feblas. En revènge, lei defensas maritimas èran mielhs bastidas, amb plusors batariás ben protegidas. Dins lo camp estatsunidenc, l'assaut foguèt inicialament menat per lei tropas aeroportadas, rapidament remplaçadas per quatre divisions d'infantariá. Avián una artilhariá importanta e un mestritge quasi complèt dau cèu. Lei combats vertadiers comencèron lo 22 de junh e leis Alemands, en despiech d'una resisténcia acarnada, deguèron se retirar vèrs lo nòrd. Divèrsei naviris sostenguèron l'avançada dei tropas aliadas e destruguèron lei posicions defensivas de la Wehrmacht. La vila capitulèt lo 30, mai quauquei tropas alemandas isoladas resistiguèron fins au lèr de julhet.
Leis Estatsunidencs perdiguèron 22 000 òmes dins lei combats (2 800 mòrts, 5 700 dispareguts e 13 500 bleçats) còntra 7 000 a 8 000 tuats e 39 000 presoniers per leis Alemands. Lo pòrt foguèt largament destruch per l'engèni de la Wehrmacht, mai leis Estatsunidencs poguèron l'utilizar a partir d'aost. Fins a la presa d'Anvèrs, foguèt lo pòrt principau per l'avitalhament dei tropas aliadas en Euròpa.