Avans-gàrdia

Una avans-gàrdia es la fraccion d'una unitat militara qu'avança dins la direccion generala de progression d'una fòrça armada. Assegura generalament un pretzfach ofensiu destinat a descubrir lei posicions de l'enemic e a establir lo contacte amb eu, a prendre lo contraròtle de posicions importantas durant lei premierei fasas d'una batalha ò a protegir la fòrça principala còntra una ataca dirècta. Dins lo cas d'una perseguida d'un adversari en retirada, l'avans-gàrdia pòu tanben èsser cargada de mantenir lo contacte per empachar la fugida de l'enemic. Per aquò, una avans-gàrdia es sovent compausada d'unitats leugieras e rapidas (cavalariá leugiera, etc.).

Organizacion teorica d'una avans-gàrdia

Una avans-gàrdia dèu avançar dins la direccion generala de la fòrça principala que la seguís. La question principala es aquela de la distància de mantenir entre l'avans-gàrdia e aquela fòrça. Dèu èsser pron corta per empachar un enemic d'atacar dirèctament la fòrça principala sensa combatre premier l'avans-gàrdia. Pasmens, dèu èsser pron lònga per desvolopar un combat autonòm que permet a la fòrça principala de gardar sa libertat d'accion. Per aquela rason, l'avans-gàrdia representa sovent una part importanta d'una armada, generalament un cinquen ò un quart.

Exemple istoric

L'avans-gàrdia ocupava una plaça centrala dins lo sistèma napoleonenc. D'efiech, èra constituïda d'una unitat pron poderosa per acceptar lo combat còntra la fòrça principala de l'enemic. Ansin, èra capabla d'establir lo contacte amb aquela fòrça, de mantenir sei posicions defensivas còntra un assaut massís ò de rompre lo contacte per se retirar. La fòrça principala, comandada per Napoleon eu meteis, se situava generalament a una distància d'un ò dos jorns de marcha. Ansin, èra possible per Napoleon de desvolopar la sieuna manòbra còntra la fòrça enemiga. La batalha d'Auerstaedt (14 d'octòbre de 1806) es una illustracion de la capacitat de combat d'una avans-gàrdia napoleonenca còntra una armada enemiga au complèt. La batalha de Friedland (14 de junh de 1807) illustra puslèu lo ròtle de l'avans-gàrdia dins la fixacion deis unitats advèrsas per permetre a Napoleon de leis anientar.

Annèxas

Liames intèrnes

• Flanc-gàrdia.
• Rèire-gàrdia.
• Resèrva.

Bibliografia

• (fr) Michel Yakovleff, Tactique théorique, 3^a edicion, Economica, 2016.