Wii U

Era Wii U ei ua consòla de videojòcs de Nintendo e era successora dera Wii. Era consòla siguec lançada eth 18 de noveme de 2012, e arribèc en Euròpa eth 30 de noveme de 2012. Siguec era prumèra consòla dera ueitau generacion, atau hec competéncia damb era PlayStation 4 e era Xbox One.

Era Wii U e eth Wii U GamePad

Foncionament

Ei era prumèra consòla de Nintendo compatibla damb grafics HD. Eth comandament principau deth sistèma ei eth Wii U GamePad, que includís ua pantalha tàctil. Maugrat qu'ei pensat entà èster utilizat amassa damb era consòla, bèri jòcs admeten non utilizar-lo o jogar solament damb eth, sense besonh deth televisor. Era sua foncionalitat en linha se centre ath torn dera plataforma Nintendo Network, ath delà deth Miiverse, un servici de hilats sociaus integradi que permetie as usatgèrs compartir contengut en comunitats especifiques entà cada jòc. Era Wii U ei compatibla damb tot eth logiciau e es accessòris dera Wii.

Recepcion

Era consòla siguec arrecebuda positivaments peth sòn innovador comandament, eth sòn prètz e fòrça des sòns jòcs, mès siguec criticada pes sòns menus lenti e pera pòca durada dera bateria deth Wii U GamePad. Es jòcs mès venudi dera consòla son Mario Kart 8, Super Mario 3D World e New Super Mario Bros. U. Solament venec 13,56 milions d'unitats, aguesta baisha chifra atribuïda principauments a ua fèbla seleccion de jòcs disponibles ath lançament dera consòla, un supòrt limitat de tresaus e un marqueting deficient. Era Wii U se quitèc de véner en gèr de 2017. Eth 3 de març de 2017, Nintendo lancèc eth successor d'aguesta, era Nintendo Switch.