Valentin Abeille (resistent)
Valentin Abeille (8 d'aost de 1907, Alençon - 2 de junh de 1944, París) es un foncionari e resistent francés de la Segonda Guèrra Mondiala nomat Companhon de la Liberacion lo 28 de mai de 1945. Cap militar dei Fòrças Francesas de l'Interior en Normandia, aguèt un ròtle important dins l'organizacion deis accions de la Resisténcia destinadas a blocar l'arribada de renfòrç alemands durant lo desbarcament.
Biografia modificar
Felen d'un òme politic de la fin dau sègle XIX, menèt d'estudis de drech que li permetèron de venir sosprefècte de Provins en 1938. Au començament de la guèrra, s'engatjèt dins lo 29en regiment de Dragons. Après la desfacha francesa, foguèt revocat de son pòste per lo Regim de Vichèi que preferiguèt lo nomar a Marselha. Tornarmai revocat en genier de 1942, anèt s'installar a Lons-le-Saunier, oficialament per i estudiar lo drech. En realitat, s'engatjèt activament dins la Resisténcia. Cap militar dau departament de Jura, son ròtle foguèt descubèrt per la Gestapo en genier de 1943, mai capitèt de s'enfugir. Brèvament nomat au Burèu Centrau d'Entresenhas e d'Accion, participèt activament a la preparacion dau desbarcament de Normandia.
Lo 13 de setembre de 1943, s'entornèt ansin en França coma delegat militar de la region « M » (Normandia, Bretanha e Anjau). Ajudat per Maurice Guillaudot (1893-1979), organizèt lei Fòrças Francesas de l'Interior encargadas d'isolar la region dau desbarcament, de secutar lei renfòrç alemands e de provesir d'entresenhas au comandament aliat. Per aquò, metèt en plaça una estructura de comandament fòrça descentralizada permetent de protegir lei diferents grops de resistents còntra leis efiechs deis arrestacions. Arrestat lo 31 de mai de 1944 e grèvament bleçat, Valentin Abeille foguèt torturat, mai refusèt de parlar. Moriguèt lo 2 de junh en causa de sei bleçaduras sensa aver prononciat lo mendre mot après sa captura.
L'organizacion dei FFI per Abeille mostrèt son eficacitat durant lo desbarcament. En despiech de l'arrestacion de son successor, Jean Kammerer, lo 13 de junh, la descentralizacion dei FFI de Normandia empachèt leis Alemands de redurre l'activitat de la Resisténcia. En particular, lei camins de fèrre e lei rets electricas foguèron regularament atacats, çò que mobilizèt de soudats alemands per assaiar de lei protegir.
En mai de l'Òrdre de la Liberacion, Valentin Abeille es recipiendari de la Legion d'Onor, de la Crotz de guèrra 1939-1945 e de la Medalha de la Resisténcia francesa.
Annèxas modificar
Liames intèrnes modificar
Bibliografia modificar
- (fr) Musée de l'Ordre de la Libération, biografia « Valentin Abeille », consultada lo 21 d'abriu de 2024, [1].