Tunèl del Mont Blanc

Lo tunèl del Mont Blanc es un tunèl rotièr que religa Chamonix-Mont-Blanc, en Nauta Savòia, França, a Courmayeur, en Val d'Aosta, Itàlia. A l'inauguracion en 1965, èra lo tunèl rotièr pus long del monde. Lo tunèl del Mont Blanc es constituït d'una galariá unica de doble sens de circulacion, lo doblament del tunèl previst foguèt pas jamai realizat per de rasons de finançament, e d'oposicion dels ribairòls costat francés, en rason des nosenças degudas a la circulacion intensa dels camions. Lo tunèl permet una reduccion del trajècte entre Chamonix e Aosta de 60 km e mai que mai d'evitar la tancadura ivernala dels passes alpencs facilitant aital los desplaçaments entre França e Itàlia.

Dintrada del costat francés

Dintrada del costat italian

Longor del tunèl : 11,6 km de Chamonix a Courmayeur. Altitud de la dintrada costat francés : 1 274 mètres ; costat italian : 1 381 mètres (lo tunèl es pas orizontal mas en forma de V inversat per facilitar l'escolament de las aigas). Passa a l'aplomb exacte de l'agulha de Miègjorn. La nautor interiora del tunèl es de 4,35 m e sa largor de 8 m (dos còps 3,5 m e dos còps 0,5 m de benda laterala).

Après de longas annadas necessàrias a son traucament, lo tunèl foguèt mes en servici lo 19 de julhet de 1965.

A sa dobertura, la gestion del tunèl foguèt desseparada en doas partidas e doas sociétats concessionàrias :

• costat francés : l'ATMB (Autoroutes et tunnel du Mont-Blanc), creada lo 30 d'abril de 1958 ;
• costat italian : la SITMB S.p.A. (Società Italiana per il Traforo del Monte Bianco), creada lo 1èr de setembre de 1957.