Triangle de Kionga

Lo Triangle de Kionga (en alemand Kionga-Dreieck) foguèt un pichon territòri situat en la Còsta Orientala d'Africa. Èra plaçat entre las colonias de l'Africa Orientala Alemanda, que la majoritat es en Tanzania uèi lo jorn, e l'Africa Orientala Portuguesa, uèi lo jorn Moçambic. L'airal fasiá prèp de 1000 Km2 . Foguèt una posession alemanda entre 1894 e 1916 a après venguèt posession portuguesa.

Los alemands avián creat una factoriá al sud del flume Rovuma en 1894. Malgrat que i aviá pas preséncia portuguesa en l'airal mai pròche, es vertat que i aviá un acòrd provisional, fach en 1886, que fasiá del flume Rovuma la frontièra entre aquestas doas poténcias europèas. De mai, se desiá que lo territòri alemand dintrava dins lo territòri portugués. La colonia de Kionga, ara apelada Quionga, aviá una populacion de 4000 abitants en 1910.

Pendent la Primièra Guèrra Mondiala los alemands declarèron la guèrra a Portugal en 1916. Las autoritats d'aqueste país veguèron amb aquò una escasença de conquistar tornarmai la soberaniá nacionala perduda e lèu conquistèron lo territòri. A la fin de la guèrra lo tractat de Versailles confirmèt la frontièra al long del flume Rovuma. La decision confirmèt qu'èra una posession portuguesa en una epòca que tota l'Africa Orientala Alemanda èra venguda una posession britanica jos lo nom de Tanganyka Britanic.

Aital, los Makonde, que demoravan al territòri, aprenguèron ara a parlar portugués e pas anglés o alemand per parlar amb las autoritats administrativas. Lo Triangle de Kiova foguèt doncs, e de facto, un territòri ganhat per Portugal per la sieuna participacion en la Primièra Guèrra Mondiala. Quand Moçambic venguèt independent lo 25 de junh de 1975, lo Triangle de Kionga, o Quionga, demorèt una partida de la Província de Cabo Delgado.