Totally Spies!

Totally Spies! es una seria animada francesa e canadiana producha per Marathon Media e creada per Vincent Chalvon-Demersay, David Michel e Gil Formosa. Es difusada ais Estats Units dempuei lo 3 de novembre de 2001, en França dempuei lo 3 d'abriu de 2002 au Quebèc. Un film foguèt difusat en França lo 22 de julhet de 2009.

Totally Spies! conta leis aventuras de tres amigas : Sam, Clover e Alex. Vivon dins la banlèga de Los Angeles e estudián au licèu Beverly High de Beverly Hills (sason 1 a 4) puei a l'universitat de Mali-U (sason 5). Estudiantas dins la vida quotidiana, son en realitat d'agents secrèts trabalhant per lo WOOHP (World Office Of Human Protection), una organizacion secrèta de proteccion de l'umanitat, situada dins lo centre de la vila. Adoran faire lei crompas au Groove o sus Rodeo Drive. Quand lo cap dau WOOHP a besonh de sei servicis, lei mandèt en mission equipadas de combinasons de latèx coloradas (jauna per Alex, roja per Clover e verda per Sam) e de divèrsei gadgets per leis ajudar de menar a bòna fin seis enquistas. Leis eroïnas son de joventas modèrnas, independentas, sofitisticas e estrambordadas tant per leis aventuras perilhosas que per lo maquilhatge o la mòda.

La fònt d'inspiracion principala es la seria Charlie's Angels deis annadas 1970. Lo ton de la seria es una mescla d'umor e d'accion e parodiá lei serias per adolescets e lei films d'espionatge. En 2008, una seria derivada, dicha SpieZ! Nouvelle Génération foguèt difusada en França. Conta l'istòria d'una equipa d'espions constituida de quatre enfants.

Personatges principaus

Samantha Simpson, dicha Sam, rossa ambé d'uelhs verds, es l'ainada dei tres espionas e la pus madura. Passionada d'art, de literatura e de distraccions culturas, fa sovent pròva d'intelligéncia e d'esperit logic. Es donc generalament considerada coma lo cap intellectuau dau grop. En mission, a una combinason verda.
Clover Ewing, dicha Clover, blonda ambé d'uelhs blaus, es l'arquetipe de l'adolescenta estatsunidenca. Passionada de shopping, de mòda, de suenhs estetics e d'aventuras amorosas, es fòrça seriosa en mission. Es equipada d'una combinason roja.
Alexandra Vasquez, dicha Alex, bruna ambé d'uelhs marrons, es l'espiona pus jova dau grop. Maladrecha e autor de mai d'una cofa, es d'un naturau viu, innocent e afectuosa. Es tanben una esportiva excellenta dins unei disciplinas coma lo fotbòl o leis arts marciaus. En mission, a una combinason jauna.
Jerry Lewis, dich Jerry, es lo fondator e lo president de WOOHP. Es donc lo cap dei tres Spies, cargat de lei mandar en mission. Maugrat son temps, es encara atletic e eficaç quand fau venir ajudar Sam, Clover e Alex pendent certanei missions. D'origina britanica, demora fòrça estacat a seis originas e utiliza sovent son flegme ambé lei tres espionas. Pasmens, es sovent bostigat per lei filhas sus son caire gentleman e son aspècte de còps ancian. Dins lo corrent de la seria, si vetz que Jerry aguèt d'estils fòrça diferents durant sa vida.

Personatges segondaris

Mandy es una joventa qu'a lo peu negre lòng e d'uelhs violets. Es la rivala dei Spies, especialament aquela de Clover, es se carpinhan sovent a prepaus de dròlles, de concors o de vèstits de mòda. Pasmens, maugrat aquela rivalitat quasi continuala, es de còps amiga o aliada ambé lei Spies. Ignora la vida secrèta dei tres joventas.
Terence es lo fraire besson malefic de Jerry. Apareisse dins la sason 3. Acusat a tòrt de trichariá per Jerry durant sa jovença, jurèt de se venjar e venguèt un criminau. Organizèt una equipa ambé d'autrei criminaus e assaièt d'eliminar lei Spies e lo WOOHP.
Britney es una joventa que venguèt agent dau WOOHP durant la sason 2. Fòrça entraïnada e intelligenta, sei qualitats e son amistat ambé Sam e Clover atirèt la gelosiá d'Alex. Pasmens, l'admiracion de Britney per lei tres espionas permetèt de demenir la tension e lei quatre filhas venguèron amigas. Après aquela mission comuna, Britney participèt de còps a d'operacions ambé Sam, Clover e Alex, especialament dins la sason 5. En mission, es equipada d'una combinason blava.