Sètge de Castèunòu dau Martegue

Lo sètge de Castèunòu dau Martegue designa un ensemble d'accions militaras que si debanèron a l'entorn d'aquela vila per lo contraròtle de son castrum durant la premiera partida de la Guèrra de l'Union d'Ais. S'acabèt per una victòria dau partit angevin, localament menat per lei Marselhés e lei Martegaus, còntra lei partisans de l'Union. Aqueu succès permetèt ai venceires d'assegurer lei comunicacions entre lei doas vilas qu'èran menaçadas per lei Sextians.

Debanament e consequéncias

Lei racòntes dei combats permèton pas de determinar lo nombre de sètges e lei detalhs de la presa de la vila per leis Unionistas. L'eveniment aguèt luòc en abriu de 1383 a una data desconoissuda siá a l'eissida d'un sètge siá a l'eissida d'un raliment de la populacion. Aquela ofensiva foguèt menada en parallèl amb d'autreis atacas de l'Union còntra de ponchs estrategics per lei Marselhés ò còntra de pòchis angevinas situadas dins lo territòri unionista (Lambesc, Ceiresta...). Aquò permetiá tanben de rompre lei comunicacions entre Marselha e la region dau Martegue e, pus generalament, de renforçar lo blocatge de la rota entre Marselha e Avinhon (onte lo papa èra favorable ais Angevins).

La reaccion marselhesa foguèt viva car la represa dau castrum si debanèt probablament avans lo 3 de mai. Lei venceires laissèron una garnison per tenir la posicion. Pasmens, lei detalhs sus leis operacions de represa son egalament desconoissuts. S'acabèron probable per la retirada ò la destruccion dei tropas unionistas car lei Martegaus foguèron liures de mandar seis aubarestiers dins la region d'Auriòu en junh per i sostenir leis esfòrç marselhés. De mai, lo contraròtle de Castèunòu dau Martegue foguèt plus contestat fins a la fin dau conflicte.

Annèxas

Liames intèrnes

• Guèrra de l'Union d'Ais.

Bibliografia

• Alain Venturini, « La guerre de l'Union d'Aix (1383-1388) », dins Rosine Cleyet-Michaud, Geneviève Étienne, Mireille Massot et al., 1388. La Dédition de Nice à la Savoie, Publications de la Sorbonne, 2019, pp. 35-141.