Revòuta dei Boxers

La Revòuta dei Boxers se debanèt en China de novembre de 1899 a setembre de 1901. Foguèt un movement d'insurreccion qu'èra inicialament opausat a la dinastia manchó, a la politica de reformas dau govèrn e la preséncia estrangiera sus lo territòri. A partir dau començament de l'annada 1900, lo govèrn de Cixi assaièt d'utilizar lo movement unicament còntra la preséncia occidentala. D'Europèus e de Chinés crestians foguèron massacrats per la foga durant tot aqueu periòde, subretot après lo començament dei combats. En junh, lei missions diplomaticas europèas installadas dins la capitala foguèron enceucladas per lei tropas regularas chinesas e lei membres dau movement dei Boxers. Lo 21 de junh de 1900, lei Occidentaus formèron una aliança granda dicha deis Uech Nacions e decidiguèron la guèrra. Lo 4 d'aost, acomencèron una ofensiva en direccion de la capitala. Maugrat una resisténcia chinesa acarnada a Peitsang (5 d'aost), Yang Tsun (6 d'aost) e a Tongzhou (12 d'aost), Pequin es atacada e conquista lo 14 d'aost. Lo govèrn chinés deguèt ajudar leis Europèus dins la repression de la revòuta que s'acabèt solament en setembre de 1901.

Armadas europèas dins Pequin pendent la Revòuta dei Boxers.