Restanca de las Tres Gòrjas
La Restanca de las Tres Gòrjas es una restanca sus lo flume Yangzi dins lo districte de Yiling e la província de Hubei en China. Foguèt mesa en servici per etapas de 2003 a 2012 e creèt una retenguda de 600 quilomètres de longor.
Se tracta de la pus granda centrala idroelectrica al monde[1]. La restanca genera en mejana 95 ± 20 TWh d'electricitat per an, en foncion de la quantitat annadièra de precipitacions dins lo bacin idrografic. Après las precipitacions abondantas de la monson de 2020, la produccion annadièra de la restanca a gaireben atenh 112 TWh, en batent lo precedent recòrd mondial d'aperaquí 103 TWh establit per la restanca d'Itaipu en 2016.
Lo còs de la restanca foguèt acabat en 2006. La centrala electrica del projècte foguèt acabada e plenament fonccionala lo 4 de julhet de 2012 quora la darrièra de las principalas turbinas idrolicas de la centrala sosterana comencèt de produire. Cada turbina idrolica principala a una capacitat de 700 MW. En coplant las 32 turbinas principalas de la restanca amb dos generators pus pichons (50 MW cadun) per alimentar la quita centrale, la capacitat de producion electrica totala es de 22 500 MW. Lo darrièr element major del projècte, l'ascensor de batèls foguèt acabat en decembre de 2015.
En mai de produire d'electricitat, la restanca es destinada a aumentar la capacitat de transpòrt du flume Yangzi. En fornissent un espaci d'estocatge de las cregudas, la restanca redutz lo potencial d'aigats en aval qu'istoricament toquèron la plana de Yangzi. En 1931, los aigats del flume causèron la mòrt de fins a 4 milions de personas. En consequéncia, China considera lo projècte coma un succès social e economic monumental, amb la concepcion de grandas turbinas a la punta de la technologia, e un movement vers la limitacion de las emissions de gases d'efièch de sèrra. Pr’aquò, la restanca provoquèt de cambiaments ecologics, especialament un risc crescut d'emboden. Per aquesta rason, la restanca foguèt controversiada tant al nivèl nacional qu'a l'estrangièr.