Qüartet Tátrai

Lo Qüartet Tátrai, en ongrés Tátrai-vonósnégyes, es un qüartet de còrdas ongrés del sègle XX, fondat en 1946 e que se separèt en 1994 .

Istòria

Un document ongrés fornís d'entressenhas - dins la lenga del país - e de fotografias nombrosas del qüartet, a l'ocasion de son 70en aniversari. Lo Qüartet Tátrai faguèt son primièr concèrt lo 8 d'octobre 1946 a Budapèst, lo darrèr lo 10 de genièr 1994 à Pannonhalma (vila del comitat de Győr-Moson-Sopron, al nòrd-oèst del país, coneguda per son abadiá).

Composicion

Primièr violon

• Vilmos Tátrai, nascut lo 7 d'octobre 1912 a Kispest (ara Budapèst), mòrt a Budapèst lo 2 de febrièr 1999

Segond violon

• Albert Rényi (1946-1955)
• Mihály Szűcs (1955-1968), nascut a Debrecen lo 22 d'octobre 1922, mòrt a Budapèst lo 20 de junh 1990
• István Várkonyi (1968-1994), nascut en 1931 a Budapèst .

N.B. Le Nouveau Dictionnaire des interprètes, d'Alain Pâris, escriu Mihály Szűcs (1955-1968) e István Várkonyi (1958- ), mès la notícia Hungaroton dels 33 torns e dels CD de l'opus 76 de Haydn, que lo Qüartet Tátrai enregistrèt en 1964, precisa que lo segond violon es Mihály Szűcs. Segur que la bona data es 1968, amai lo document dejà citat la confirma.

Alto

• József Iványi, nascut lo 8 de febrièr 1920 a Kispest, mòrt lo 3 de genièr 1967 a Budapest (1946-1959)
• György Konrád (1959-1994), nascut lo 18 d'octobre 1924 a Szeged

Violoncèl

• Vera Dénes (1946-1951), nascuda Vera Grossmann lo 12 de març 1915 a Budapèst, ont moriguèt lo 16 de març 1970
• Ede Banda (1951-1994 ), nascut lo 6 d'abril 1917 a Budapèst, ont moriguèt lo 23 de junh 2004

Importància musicala

Un document ongrés fornís, çò sembla, la totalitat dels enregistrements del Qüartet Tátrai .

Lo Qüartet Tátrai es mai que mai reconegut dins Bartók e Haydn (que, pr'amor de sa longa preséncia a Eszterháza, es considerat en Ongria gaireben coma un compositor nacional). Los Tátrais enregistrèron l'integrala dels qüartets de còrdas de Haydn, en començant per l'opus 76. Aquela interpretacion foguèt recebuda elogiosament, mai que mai per la critica francesa, mès, pr'amor de l'edat dels musicians (lo programa d'enregistrament s'acabèt en un quart de sègle) e, çò qu'es pièger, del primièr violon, nascut en 1912, e del retard tecnic dels enregistraments de Hungaroton, las serias enregistradas après l'opus 76 agèron un succès mendre. L'interpretacion de l'opus 76 foguèt longtemps considerada sovent coma la milhora de totas , amai benlèu encara.

Nòtas e referéncias

En mai del libre d'Alain Pâris citat en introduccion, los articles ongrés e anglés consacrats al Qüartet Tátrai, o a d'unes de sos musicians, son la font principala de l'article.

Dins l'article, lo pichon nom de las personas es plaçat abans lo nom patronimic, mès l'usatge ongrés es de metre lo pichon nom aprèp.