PT-91 Twardy
Lo PT-91 Twardy es un carri de combat principau polonés desvolopat a partir dau T-72M1. Intrat en servici en 1996, a per objectiu d'adaptar lo T-72 a la guèrra modèrna en corregissent sei defauts coneguts (manca de mobilitat, blindatge insufisent, estabilizacion tròp febla dau tir, etc.). Per aquò, lo PT-91 intègra de placas de blindatge reactiu aguent una signatura radar reducha, un visaire termic e un detector de lasèr capable d'entraïnar lo tir de fumigèns defensius. Plusors versions son estadas concebudas, especialament per metre en plaça de motors pus eficaç e aumentar la velocitat dau carri sus lo prat batalhier. Au mens 285 exemplaris son estats produchs. En mai de Polonha, lo PT-91 es estat adoptat per Georgia e Malàisia. Durant la Guèrra d'Ucraïna, un certan nombre de carris polonés foguèron transferits a l'armada ucraïnesa.
