Operacion Sonnenwende
L’Operacion Sonnenwende es una ofensiva alemanda que se debanèt entre lo 15 e lo 18 de febrier de 1945 durant la Segonda Guèrra Mondiala. Son objectiu èra d'expulsar lei fòrças sovieticas dei territòris orientaus dau Reich. L'ataca foguèt una suspresa per lei Sovietics mai lei condicions meteorologicas empediguèron leis unitats mecanizadas de la Wehrmacht d'esplechar son succès iniciau. Puei, leis Alemands se turtèron a de bombardaments intensius menats per l'artilhariá e l'aviacion sovietica e deguèron finalament tornar venir sus sei posicions d'origina.
Dins aquò, la revirada alemanda foguèt pas totala car l'ofensiva inquietèt lei Sovietics e alentiguèt l'ataca en direccion de Berlin. D'efiech, durant l'ataca, leis unitats alemandas avián mostrat una fòrta combativitat e lei Sovietics preferiguèron donc redurre premier lei pòchis de resisténcia situadas sus seis alas avans d'avançar vèrs la capitala.