Ofensiva dau Tet
L'ofensiva dau Tet se debanèt dins lo corrent de la Guèrra de Vietnam dau 30 de genier au 30 de setembre de 1968. Foguèt un ensems d'atacas organizadas per lo Vietcong, sostengut per lo Vietnam dau Nòrd, que mobilizèron 80 000 òmes dirigits per lo generau Vo Nguyen Giap. Èran dirigits còntra divèrsei posicions tengudas per lei tropas sud-vietnamianas e estatsunidencas qu'alinhavan aperaquí un milion d'òmes.
Mau coordenadas e dispersadas còntra un nombre tròp important d'objectius (un centenau de vilas foguèron atacadas), la màger part deis atacas foguèron rapidament rebutadas. Pasmens, dins la region de Hue, de Saigon e de Khe Sang, lei defensors foguèron esbrandats e de batalhas saunosas foguèron necessàrias per arrestar lei tropas comunistas. Militarament vencut, lo Vietcong ganhèt un succès de propaganda fòrça important car l'opinion publica estatsunidenca foguèt fòrça impressionada per la combativitat de la guerilha. Venguèt alora fòrça ostila a la perseguida de la guèrra entraïnant lo retirament progressiu dau còrs expedicionari estatsunidenc en 1973.