Michael Bublé

Michael Steven Bublé (Burnaby, Canadà, 9 de setembre de 1975) es un cantaire e actor canadian. Encara que son primièr album arribèt dins lo "top ten" de divèrsas ràdios de Canadà e del Reialme Unit, foguèt sonque en 2005 que sa carrièra musicala progressèt e que lo cantaire venguèt famós als Estats Units gràcias a son quatren album It’s time que se vendèt a mai de 8 milions d'exemplars. L'album seguent Crazy Love consolidèt sa notorietat e lo faguèt conéisser a nivèl internacional. Bublé a ganhat mantun prèmi, coma tres prèmis Grammy e mai d'un Juno Awards.

Es maridat dempuèi 2009 a la modèla argentina Luisana Lopilato.

Biografia

Michael Bublé nasquèt en 1975 a Burnaby, una vila importanta de Colómbia Britanica, dins una familha modèsta, ainat de tres enfants. Son paire, Lewis Bublé, èra un pescaire e Michael trabalhèt amb el quand èra jove. Sa maire, Amber, èra d'origina italiana e lo paire d'aquesta, un emigrant originari del Venèt, aguèt una influéncia enòrma sul jove Bublé.

Estudièt a la Seaforth Elementary School e a Cariboo Hill Secondary School. L'interès de Bublé pel jazz comencèt a l'entorn de l'edat de cinc ans.

Discografia

BaBalu (2001)
Dream (2002)
Michael Bublé (2003)
It's Time (2005)
Call Me Irresponsible (2007)
Crazy Love (2009)
Christmas (2011)
To Be Loved (2013)