Libe deus Jubilèus

Lo Libe deus Jubilèus qu'ei un tèxt apocrif de l'Ancian Testament atribuit a Moïses qui presenta l'istòria deus patriarcas despuish la Creacion dinc a l'instauracion de la Hèsta de Pascas. En grèc qu'ei coneishut devath lo nom de Λεπτογένεσις Leptogenesis, valent a díser "Genèsi minora". Los Jubilèus que son un exemple de Bíblia reinventada. Produit per mieis judius pendent lo periòde deu Segond Temple, lo libe n'obtiengó pas estatut canonic dens lo judaïsme rabinic e n'estó pas integrat a la Bíblia deus Setanta mes qu'estó inclús dens lo canon de la Glèisa ortodòxa etiòpa. Difusat en Euròpa a partir deu sègle XIX quan uns manuscrits estón importats d'Etiopia, qu'estó arrevirat deu gueez en mantua lenga mes non suscitè pas hèra d'interès dens la comunautat academica abans de la descobèrta de mantun fragment en ebrèu.