Jean-Louis Aubert

Jean-Louis Aubert es un cantaire, guitarrista e compositor francés de París. Au començament, fasiá de rock francés ambe son grop Téléphone, que n'es estat lo cantaire entre 1976 e 1986, puèi s'es virat cap a d'autras influéncias pendent sa carrièra solò, coma la cançon francesa (Quand Paris s'éteint, Bien sûr) o lo funk (Tel est l'amour, Locataire).

Jean-louis Aubert sus l'empont en 2016 (ambe son fidèl bataire al fons : Richard Kolinka)

Biografia

Jean-Louis Aubert es nascut lo 12 d'abril de 1955 a Nantuat dins l'èst de França pr'amor qu'a-n'aqueste moment, son paire i trabalhava coma jos-prefet. Mès a sustot viscut aprèp en region parisenca (a partir de 1959). Descobrís encara pichon de caps 1964 los Beatles, çò que serà per el una revelacion e lo balharà enveja de far de rock. Aital, tre 1971 monta son primièr grop al licèu. En cambiar de licèu en 1973, rencontra un autre licean que jòga tanben de guitarra : Louis Bertignac. En 1975, fòrma lo grop Sémolina ambe lo bataire Richard Kolinka e enregistra un 45 torns ençò de WEA pendent l'estiu de 1976 : Jean-Louis Aubert i canta lo tròç de la fàcia B que se ditz Plastic rocker. Lo Richard a organisat un concèrt pel 12 de novembre de 1976 au Centre American de París, a part qu'entre temps lo grop Sémolina se's desseparat. Demanda alavetz a Jean-Louis d'i anar cantar. Còp-sèc, Jean-Louis sona lo Louis Bertignac per los i acompanhar coma guitarrista. Lo Louis Bertignac accèpta, en i menar una bassista, sa companha a-n'aqueste moment, que se sona Corine Marienneau. Es aital qu'es nascut lo grop Téléphone.

En 1986, Téléphone se dessepara. Jean-Louis Aubert contunha pr'aquò la musica ambe Richard Kolinka e d'autres musicians jos lo nom de Aubert'n'Ko au començament, puèi simplament Jean-Louis Aubert tre lo second album Bleu, Blanc, Vert en 1989. Obteng d'alhor un primièr tube tre son primièr 45 torns pòst-Téléphone, Juste une illusion. Lo primièr d'una longa seria, que n'aurà fòrça d'autres, coma Temps à nouveau en 1993, Alter ego fin 2001 etc.

Entretemps, Téléphone s'es tornat formar ocasionalament, mès sens la Corine : Jean-Louis Aubert, Richard Kolinka e Louis Bertignac son alavetz montats sus l'empont en 2017 jos lo nom de « Les Insus » (vist qu'es pas exactament Téléphone sens la Corine).

Discografia (aprèp Téléphone)

• Plâtre et Ciment (1987)
• Bleu Blanc Vert (1989)
• H (1993)
• Stockholm (1997)
• Comme un accord (2001)
• Idéal standard (2005)
• Roc éclair (2010)
• Les Parages du vide (2014)
• Refuge (2019)
• Pafini (2024)

Cançons mai conegudas

• Juste une illusion (1986)
• Les plages (1987)
• Quand Paris s'éteint (1987)
• Tel est l'amour (1987)
• Locataire (1989)
• Voilà, c'est fini (1990)
• Univers (1990)
• Temps à nouveau (1993)
• Entends-moi (1993)
• Toi que l'on n'Homme pas (1993)
• Moments (1994)
• Le bateau sous la terre (1994, version sus l'empont)
• Le jour se lève encore (1997)
• Alter Ego (2001)
• Commun accord (2002)
• Milliers, Millions, Milliards (2002)
• Sur la route (2003, ambe Raphaël)
• Parle-moi (2005)
• Ailleurs (2006)
• À ceux qui passent (2007)
• Demain sera parfait (2010)
• Bien sûr (2019)
• Merveille (2024)