Insureccion de Varsòvia
L'insureccion de Varsòvia se debanèt dins lo corrent de la Segonda Guèrra Mondiala dau 1èr d'aost au 2 d'octòbre de 1944. Opausèt la resisténcia interiora polonesa (principalament l'Armia Krajowa) que prenguèt lo contraròtle d'una partida de la capitala polonesa ai fòrças alemandas cargadas de reprimir l'insureccion. Organizada a la lèsta e sensa sostèn sovietic, la revòuta mau capitèt e foguèt finalament anientada maugrat una resisténcia acarnada. Après la fin dei combats, Hitler ordonèt la destruccion de la ciutat en represalhas.
L'insureccion foguèt un desastre per la resisténcia polonesa non comunista que perdiguèt au mens 31 000 òmes (10 000 tuats, 6 000 dispareguts e 15 000 presoniers). Entre 150 000 e 200 000 civius foguèron tanben tuats. En particular, entre 40 000 e 100 000 civius e presoniers foguèron executats pendent lo Chaple de Wola (5-8 d'aost de 1944). De mai, aperaquí 700 000 abitants foguèron expulsats de la vila après la batalha. Enfin, 5 000 soudats de l'armada polonesa integrada au sen de l'Armada Roja foguèron pereu perduts dins la revirada d'una ataca destinada a rompre lo sètge de la vila. De son caire, l'armada alemanda perdiguèt entre 23 000 e 25 000 òmes (7 000-9 000 tuats, 7 000 dispareguts e 9 000 bleçats).