Gutis
Lei Gutis son un pòble antic originari de la region dei Monts Zagros. A la fin dau milleni III avC, migrèron vèrs Mesopotamia onte menèron d'incursions fòrça violentas còntra lei ciutats de la region. I entraïnèron la fragmentacion de l'Empèri d'Akkad, incapable de leis arrestar, e i conquistèron un estat. Pasmens, foguèron vencuts per lo rèi Utu-hegal d'Uruk e dispareguèron pauc a pauc dei tèxtes istorics.
Son origina e sa cultura son desconegudas. Èran considerats coma de « barbars » per lei Mesopotamians. La violéncia de seis invasions e de sei guèrras marquèt prefondament leis abitants de Sumèr. Ansin, au sègle VI avC, lo rèi babilonian mencionèt lei destruccions dei Gutis dins un tèxte parlant dei degalhs subits per lo temple de la divessa Annunitu de Sippar)