Guèrra d'Indepéndencia de Grècia

La Guèrra d'Indepéndencia de Grècia es un conflicte se debanant de 1821 e 1830 entre l'Empèri Otoman e una insureccion grèga ajudada per una coalicion d'estats europèus formada de Reialme Unit, de França e de Russia. S'acabèt per una victòria grèga e la formacion d'un reiaume grèc dirigit per Oton Ier.

Batalha de Navarin (20 d'octòbre de 1827).

La guèrra comencèt lo 25 de març de 1821 per una revòuta de crestians ortodòx de Grècia còntra la dominacion otomana. L'insureccion foguèt mau reprimida e lu Grècs poguèron proclamar la formacion d'un estat grèc independent lo 1er de genier de 1822. Puei, de 1822 a 1824 ajudats per la communautat grèga europèa e per una partida de l'elèit grèc de Constantinòple, lu Grècs avèron una tièra de batalhas còntra li fòrças otomani. En revènge, mau capitèron de trobar un sostèn auprès dei poissanças europèi. La rason principala d'aquela manca èra lo pensament austrian de mantenir l'equilibri dau continent e d'empachar una poissança d'aprofichar lo declin otoman.

En 1824, lu Otomans aprofichèron la division dei tropas grègi entre faccions diferenti per cridar a l'ajuda son vassau egipcian Muhammad Ali. L'arribada dei tropas egipciani permetèt mai d'un succès turcs mai entraïnèt tanben una multiplicacion dei chaples. Aquela situacion permetèt donc una intervencion de Russia, poissança protectritz dei crestians ortodòxs. Entraïnèt tanben una reaccion britanica car Reailme Unit voliá limitar lu progrès rus dins la region. Enfin, França mandèt tanben un còrs expedicionari en Mediterranèa Orientala amb una posicion ambigua. D'efèct, per son govèrn, lu Grècs èran de liberaus mentre que lo govèrn francés de la Restauracion èra un país actiu de la Santa Aliança. Pasmens, aquela guèrra èra tanben l'occasion de protegir de populacions crestiani còntra l'opression d'un estat musulman.

En 1827, França, Anglatèrra e Russia decidiguèron d'organizar una demonstracion militara per maucorar la contuniacion de la guèrra per l'Empèri Otoman. Li flòtas turca e egipciana foguèron anientadi a Navarin per lu aliats e d'operacions terrèstri foguèron organizadi per França e Russia. Russia aprofichèt la situacion per declarar una guèrra dubèrta e annexar divèrsei territòris (Bessaràbia, Georgia, sud d'Armenia) au tractat d'Andrinòple. Li intervencions francesa e russa entraïnèron la fin de la guèrra en Grècia. Una conferéncia organizada a Londres en 1830 confirmèt l'indepéndencia de Grècia que foguèt acceptada per Àustria e Prússia. Enfin, sensa l'ajuda d'una autra poissança, l'Empèri Otoman deguèt finalament l'acceptar en 1832 au tractat de Constantinòple.