Fabian (papa)
Fabian (mòrt lo 20 de genier de 250) foguèt, segon la tradicion catolica, lo 20en evesque de Roma dau 10 de genier de 236 a sa mòrt. Succediguèt a Antèri (235-236) e foguèt remplaçat per Cornelha (251-253).
Son pontificat foguèt marcat per un aplant provisòri dei persecucions còntra lei crestians en causa dei dificultats militaras e politicas intèrnas de l'Empèri Roman devesit entre unei pretendents au títol imperiau. Fabian aprofichèt aquela situacion per reorganizar la Glèisa afeblida per l'esquisma menat per Ipolit de Roma e mandar de missionaris dins l'Empèri, especialament en Gàllia. S'ocupèt tanben d'entretenir lei catacombas e de reprimir certaneis abús apareguts dins lo corrent dei periòdes precedents. En revènge, foguèt lo protector de Novacian — qu'anava per la seguida èstre a l'origina d'un esquisma — maugrat lei conseus contraris dau clergat.
En 249, l'emperaire Deci ordonèt una tièra novèla de persecucions. Fabian foguèt arrestat au començament de 250, torturat e decapitat lo 20 de genier.