Ecò dau Bosqueton

L'Ecò dau Bosqueton foguèt una revista facha pels felibres occitans qu'èran partits al front durant la Primièra Guèrra Mondiala.

Istòria

Durant la Primièra Guèrra Mondiala un grop de felibres partits al front decidiguèron de crear l'"Escòla dau Bombardament". Lo fondador d'aquel grop foguèt un felibre de Velai, Albèrt Bodon-Lasèrmas, qu'èra en aquel temps sargent major del 286 de linha. En genièr de 1915 amassèt de gents de son país ont s'apondèron de gents d'autres ròdols, d'occitans mas tanben de franceses, pas sonque d'escrivans mas tanben de pintors e de musicians. Se creèt una revista que a la debuta aviá son nom en francés Écho du Boqueteau e que venguèt mai tard l'Ecò dau Bosqueton. Èra generalament setmanièra mas las dificultats d'impression en temps de conflicte faguèron que de còps s'estampèsse amb de retard. Del temps del conflicte s'amassèron fòrça felibres a l'entorn del grop original coma per exemple Loís Abric e Marius Jouveau que mantun escriguèt qualques vèrses dins lo jornalet. Francés Posòl, felibre de Vilanòva d'Avinhon, venguèt capiscòl de l'Escòla dau Bombardament en 1916 quand Bodon nafrat passèt qualque temps a l'espital. Malgrat lo conflicte e las dificultats d'organizacion s'i celebrèt la Santa Estèla en 1916 e 1917.