Cadau e Eth Hereishet

Cadaus e (Eth ?) Hereishet (en francés, oficiaument, Casaux-Fréchet) qu'ei ua anciana comuna occitana, fusionada en 1979 dens era comuna de Cadau, Eth Hereishet, Anèra e Camors.

Que ho creada en 1806 per era fusion de Cadau de Dessús e Eth Hereishet.

Administrativament qu'èra dens eth canton de Bordèras (uei Bordèras de Loron) e eth arrondiment de Banhèras, deth departament deus Hauts Pirenèus.

Toponimia

Cadaus

Era prononciacion qu'ei [ka'daws (dé héré'chét)] (grafia fonetica deths autors). Eras fòrmas ancianas que son : Cazaux en Aure en 1723-1769, Cazeaux-Debat en Loron en 1738, Cazeaux-Dessus en Loron en 1738, Cazaux de Louron en 1790 e 1806.

Segon Dauzat, Casaus que vien deth latin cas-ale ( de casa, « ostau, puish proprietat rurau »), « meitaderia ». Segon Negre, citat per M. Grosclaude, Casaus que vien deth gascon casal, [---->] casau, « ancian mot òrt, proprietat rurau, tèrras qui dependen dera casa, claus ».

Segon Miquèu Grosclaude, adara, casau / cadau qu'ei l'equivalent deth ancian mot òrt, en èra pas atau ara Edat Mejana; casau qu'èra ua proprietat rurau non nòbla; en l'anciana parròpia de Cadaus, que i avè dus vilatges : Cadaus Devath e Cadaus Dessús (Casalem inferiorem e Casalem superiorem).

Patrici Pojada qu'a mau legit Grosclaude : -s finau qu'ei dens era prononciacion citada.

Hereishet

Era prononciacion qu'ei [héré'chét] (grafia fonetica deths autors). Eras fòrmas ancianas que son : de Fraxineto, en latin, en 1387, Frechet en Loron en 1738, Cazeaux-Dessus en Loron en 1738, Fréchet de Louron en 1790. I a pas d'article.

Segon Dauzat, Hereishet que vien deth latin fraxinetum, « ensemble de hereishos ».

Segon Miquèu Grosclaude, Hereishet que vien deth latin fraxinetum, « lòc on i a hereishos ». Qu'ei era evolucion locau normau deth latin fraxinetum. Eth sufixe -et ei pas un diminutiu, qu'ei un sufixe collectiu vegetau.