Còri
Lo còri es un magma metallic e minerau constituït d'elements fonduts dau còr d'un reactor nuclear e dei mineraus que pòu absorbir dins son environament. Sa formacion es accidentala e sa gestion es un element important de la seguretat dei centralas en cas d'accident nuclear. D'efiech, lo còri es una substància fòrça perilhosa en causa de sa temperatura e de sa radioactivitat extrèma. A la superficia de la Tèrra, es unicament present dins lei centralas de Three Mile Island, de Chornobil e de Fukushima.
Lo còri se forma dins un reactor nuclear somés a un subrecaufament. Dins aqueu cas, lei mesuras de proteccion permèton d'arrestar la reaccion de cadena mai la temperatura tròp auta entraïna la fusion dau combustible, d'elements d'assemblatge e de divèrseis equipaments. Sa temperatura iniciala pòu aisament agantar 3 000 °C e sa radioactivitat intèrna produtz una calor sufisenta per entretenir sa fusion. Lo còri pòu ansin demorar a l'estat liquid durant d'annadas e entraïnar de degalhs suplementaris. Per exemple, lo còri format durant la catastròfa de Chornobil passèt un jaç de dos mètres de betum en causant la fusion dau materiau.
Lei mejans de lucha còntra lo còri son limitats. Sa temperatura pòu rompre la molecula d'aiga e entraïnar la formacion d'una mescla explosiva de diidrogèn e de dioxigèn. En parallèl, lei radiacions emesas son letalas per totei totei leis èssers umans e son tanben pron intensas per alterar rapidament totei lei circuits electronics. Uei, lei centralas nuclearas son ansin concebudas per favorizar la division e l'estalament dei massas de còri susceptiblas de sortir d'un reactor. L'objectiu es de formar de jaç fins que seràn pus susceptibles de se refrejar au contacte de l'aire.
Liames intèrnes
modificar- Accident nuclear.
- Pè d'elefant, formacion de còri de Chornobil.
Bibliografia
modificar- (fr) S. Fayette e P. Piluso, Étude des propriétés thermiques du corium – Base de données CORPRO, Conférence Matériaux 2002.